cronica literaria : question de lenga

Legissi en coberta del "Cahier Max Rouquette n°6" Entretien avec Serge Carles, traducteur. Aquò me rapela la remarca que me faguèri en agachant lo volum Una cadena de voses publicat per Letras d'Oc : podetz cercar, i a cap d'indicas sus la lenga originala, pas que la mencion "traduccion occitana de Sèrgi Carles". Çò que manca pas de pausar question. Traduccion de quuna lenga ? de l'anglés, de l'afrikaans ... o de la version francesa ? E tant que ne sèm als sovenirs me rementi d'un còp que lo Sèrgi Carles èra vengut a l'ostal e que me faguèt véser de tròces d'una revirada que fasiá a partir de la version francesa del libre Une chaîne de voix d'André Brink, m'aviá dich tamben, aquel jorn, que revirava de poèmas de Norge en occitan -a partir de la version originala belga-. E legissi duèi sul blog "L'oiseau de feu du Garlaban" de J.L. Pouliquen que lo Sèrgi Carles traducteur auriá tanben revirat Selma Lagërlof. A partir de la version originala en suédés ?

Esclairatz lo paure colhon que soi ! qual es l'intérés de revirar de libres angleses, suédeses, espanhòls o d'altras lengas en occitan ( emai seriá lo melhor, lo mai "autentic" e blós ) via de versions -de filtres- mai o mens bonas en lenga francesa ?
E puèi, la pus mendra correccion voldriá que siá precisada la lenga de la version d'origina, non ? O alara aquò's que marcar "traduccion en occitan a partir de la version francesa" fa pas tròp seriós benlèu ...
E per çò qu'es de las reviradas d'òbras en francés cap a l'occitan ne soi demorat a la remarca que faguèt Felix Castan dins una acampada de la revista OC : "ieu vau al pus cort : la version originala.

J.B. Resseguièr